Ендокринолошки дијабетолошки консултации

Што е ендокринологија?
Ендокринологијата е субспецијалност во рамки на интерната медицина. Ендокринолозите дијагностицираат и третираат болести и пореметувања на функциите на жлездите со внатрешно лачење-ендокрините жлезди како што се дијабетес , пореметувања на тироидната жлезда, растројства на метаболизмот на мастите, хипертензија, остеопороза, нарушена функција на надбубрежните жлезди, хипофизата, хормонални растројства кои предизвикуваат неплодност, снижен шеќер во крвта, пореметен раст и развој, низок крвен притисок и проблеми со телесната тежина.

Ендокрин систем
Ендокриниот систем е составен од жлезди кои продуцираат хормони коишто го регулираат растот на телото, метаболизамот, сексуалниот развој и функција. Хормоните се ослободуваат во крвотокот и преку него се транспортираат до органите ширум организамот.

Табелата и шематскиот приказ подолу ја објаснуваат анатомијата и функцијата на овие жлезди.

Јајчници и тестиси	Ослободуваат хормони кои влијаат на женските и машките полови карактеристики.
Панкреас	Лачи инсулин-хормон која го контролира искорисувањето на шеќерот во организмот.
Паратироидни жлезди	Лачат хормон кој го одржува нивото на калциум во крвта
Пинеално телце	Регулација на дневните биолошки циклуси
Хипофиза	Лачи голем број на различни хормони кои директно влијаат на работата на другите жлезди со внатрешно лачење
Тимус	Игра улога во имуниот систем на телото.
Тироидна жлезда	Лачи хормони кои стимулираат создавање на топлина во телото, раст на коски и регулација на енергетскиот метаболизам.
Надбубрежни жлезди	Поделени се во две регии:дел кој лачи хормони кои имаат влијание врз метаболизамот, биохемизмот на крвта и телесните карактеристики, како и дел кој лачи хормони кои имаат влијание врз дел од нервниот систем кој е инволвиран во процесите на одговор и одбрана на организмот против стрес
Хипоталамус	Учествува во активација и контрола на дел од нервниот систем кој ги контролира автономните телесни функции, целокупниот хормонален систем, бројни други телесни функции меѓукои и регулацијата на спиењето и апетитот